Alle den ghenen die desen brief sellen eien of horen lesen doe ick verstaen Willem van Ameronghen schout int Goy in mijns lieffe heren gherecht van Utrecht dat
voir mij en voir die lantgenoeten en buere die hier nae bescreven staen quamen int gherechte voirge[noemd] Wouter Jans soen vanden Velde ende Aernt Jansz vanden
Velde gebrueders ende begheerden eens oerdeels off die vierdalve morgen lants ende negen roeden alsoe groet ende alsoe cleijn alse die gelegen zijn inden gherechte
voirscreven dair die nonne van Sinte Servaes bijnnen Utrecht boven en Willem die Vosse beneden naest gelant zijn ende dair toe noch die rechte helfte
van eene morgen lants gelegen in den gerechte voirsr[even] t eijnden aen die vierdalve morgen ende negen roeden voirscr[even] dair die kerck int Goeij die werderhelfte
vanden morgen lants voirscreven off toe behoert dair Willem die Vosse boven den mergen lants ende Dirck Aerntsz beneden naestgelant sijn also vrij ende alsoe
losse hem wair dat sij die mochten vercoopen versetten verstellen en den vrijen eijgendom dair van overgheven vrijelijken wien dat sij wouden ende hem
wert ghewijst mit recht en mit oirdele dat sijt weldoen mochten ende dattet mijtte rechte stedicheit hebben ende houden sell ende aldair soe gaiven
alse wouter ende Aernt voirsz[egd] mit gesamender hant alse recht wijsde over Gerijt Eerstensoen den vrijen eijgendam van die vierdalff mergen lants
ende negen roeden ende den vrijen eijgendom van die rechte helfte vanden eenen mergen lants alsoe alse die hier voir bescreven ende bepaelt staen ende
vertegen dair off ende mede van alle rechts ende toeseggens dat sij dair aen hadden ende van allen brieven die dair of ruerende zijn tot Gherits behoeff
voirg[enoemd] alsoe die lantgenoten ende buere voirsz[egd] wijsden dat recht was ende zijt mit rechte schuldich waren the doen ende dat die ghijfte ende vertichte
mitten rechte stedicheit hebben ende houden sell en sij geloifdent hem mede jair en dach te vrijen ende the waren alse erffcoop recht is naden recht
van den lande en alle voircommer off the doen sonder argelist hier waren over ende aen daer dit geschiede Henrick Stoeck, Jan van Zande ende Henrick
Gherijtsz lantgenoeten ende buer inden gerecht voirscre[ven] ende anders veell goeder luijde in kennisse der wairheit soe hebbe ick Willem van Amerongen
schout voirscr[even] mijnen segell aen desen brieff gedaen van des gerechts wegen over mij selven ende mede over die lantgenoeten en buere voirscre[ven] om hoere bede wille
dat wij lantgenoeten ende buere voriscre[ven] oirkonden ende tugen onder des schoutten segell voirscr[even] ende hebben hem gebeden desen brief mede over ons te bezegellen
mit zijnen segele want wij hier mede over ende aen waren dair dit geschiede gelijck hier voir bescreven staet gegeven int jair ons heere duijsent vierhondert
negen ende t seventich des donredags nae sinte valentijns dach |
