Alle den ghenen die desen brief sullen zijen off hoeren lesen doe ick verstaen Willem van Ameronghen schout int
Goey in mijns liefs heren gerecht van Utrecht dat voir mij en voir die lantgenoeten en buere die hier nae bescreven
staen quamen int gerechte voirge[noemd] Gerrijt Eersten soen ende Lijsbet sijn wijf ende begheerden eens oerdeels off die vier
dalve morgen lants ende negen roeden alsoe groet ende alsoe cleijn alse die gelegen zijn inden gherechte voirscreven
dair die nonne van Sinte Servaes bijnnen Utrecht boven en Willem die Vosse beneden naest gelant zijn ende
dair toe noch die rechte helfte van eene morgen lants gelegen in den gerechte voirsr[even] t eijnden aen die vierdalve
morgen ende negen roeden voirscr[even] dair die kerck int Goeij die werderhelfte vanden morgen lants voirscreven of toe be
hoert dair Willem die Vosse boven den mergen lants ende Dirck Aerntssoen beneden naest gelant sijn also vrij en
alsoe losse hem wair dat sij die mochten vercoopen versetten versellen en den vrijen eijgendom dair van
overgheven vrijelicken wien dat sij wouden ende hem wairt gewijst mit recht en mit oerdele dat sijt weldoen
mochten ende dattet mijtte rechte stedicheit hebben en houden sell ende aldan soe gaeven alse Gerijt Eersten soen
ende Lijsbet sijn wijf voirscreven mijt gesamender hant alse recht wijsde over Willem Eersten soen des voirscrevens
gerijt brueder den vrijen eijgendom van die vierendalve mergen lants en negen roeden en den vrijen eijgen
dom van die rechte helfte van den eenre mergen lants alsoe alse die hier voir bedreven ende bepaelt staen ende
vertegen dair of ende mede van alle rechts en toe seggens dat sij dair aen hebben en van allen brieven die
dair of ruerende sijn tot Willems behoeff voirg[enoemd] alsoe die lantgenoten en buere voirsz[egd] wijsden dat recht was
ende sijt mit recht eschuldich waerd te doen en dat die gijffte en vertichte mitten rechte stedicheit hebben en
houden selle ende sij geloifdent mede jair en dach te vrijen en the waeren alse erfcoop recht is nae den recht
van den lande en alle voircommer of te doen sonder argelijst hier waren over ende aen daer dijt geschijede Gerijt
Hermanssoen, Gherijt van Roeijensteijn, Koesijn Stevenssoen ende Andries Willem Gijsbertssoens soen lantgenoeten
ende buer inden gerechte vors[zegd] en anders veel goeder luijde in kennijsse der wairheijt doe hebbe ick Willem van
Amerongen schout voirscr[even] mijne segell aen desen brief gedaen van des gerechts weghen over mij selven enden
meede over die lantgenoeten en buere vorsz[egd] om hoere bede wille dat wij lantgenoeten en buere vorisz[egtd] oirconden
en tueghen onder des schoutten segell voirschr[even] en hebben hem gebeden desen brief mede over ons te besegellen
mijt sijnen zegelle want wij hier mede over en aen waren dair dijt geschiede geliefe hier voer bescreven staet
zeghenen int jair ons here duijsent vierhondert ende tachtich opten wijtten donredach |
