Alle den ghenen die desen brief sullen sien off horen lesen der ick verstaen Willem Taets van Ameronghen schout int goey ende Houten Marijns liefs
hren gherechte van Utrecht dat dat voir mij en voir die lantgenoten ende buer die hier nae bescreven staen quam int gerechte voirscreven Willem
Eerstensz ende begheerde eens oirdeels off die vierdalve morgen lants ende negen roeden alsoe groet ende alsoe cleijn alse die gelegen zijn inden
gherechte voirscreven dair die nonne van Sinte Servaes bijnnen Utrecht boven ende Willem die Vosse beneden naestgelant zijn ende dair toe noch off
die rechte helfte van eene morgen lants gelegen in den gerechte voirsz[egd] tegendeij aen die vierdalve morgen ende neghen roeden voirscreven dair die
kerck int goeij voirscreven die werderhelfte vanden selven morgen lants voirscreven off toebehoert dair Willem die Vosse boven ende Dirck Aerntsz
beneden naestgelants zijn alsoo vrij ende alsoe losse hem wair dat hij die mochte vercopen versette ende dem vrijen eijgendom dair van over
geven vrijlicken wien dat hij woude ende hem werdt gewijst mit recht ende mit oirdele dat hijt wel doen mochte ende dattet mitte rechte
stedicheit hebben sell ende aldair soe gaff Willem Eerstensz voirsz[egd] over heere Bertout Huijgensz vicarius then doem t Utrecht tot behoeff den eerbaren
heere deken ende capittel der kercken then doem t Utrecht voirscreven den vrijen eijgendom van den vierdalven morgen negen roeden lants enden
den vrijen eijgendom van die rechte helfte van den eene morgen lants voirscreven alsoe alse dat hier voir becreven ende bepaelt staet ende
hij verteech dair off ende van alle rechte ende toeseggens dat hij dair aen hadde ende mede van allen brieven die dair off rurende zijn
tot den eerbaren heere deken ende capittels behoeff voirge[noemd also die lantgenoten ende buere voircreven sijsden dat recht was ende hij mit
rechte schuldich was the doen ende dat die ghijste ende vertichte mitten rechte stedicheit hebben ende houden sell ende hij geloefdet
hem mede jair ende dach the vrijen ende the wairen alse erffcoop rechts is naden recht vanden lande ende alle voircommer off the doen
sonder argelist hier waren over ende aen dair dit geschiede Johan van Ruesse van Wulven, Ghijsbert van Nijewenroede splintersz
ende Dirck Seunne lantgenoten ende buere inden gherechte voirscreve ende anders veel goeden luijde in kennisse der wairheit soe
hebbe ick Willem Taets van Amerongen schout voirscreve mijne segel aen desen brieff gedaen vandes gherechte wegen over mij
selve ende mede over die lantgenoten ende buere voirscreven om here beden wille datwij lantgenoten ende buere voirscreven oirkonden
ende tegen onder des schouten segel voirscreven ende hebben hem gebeden desen brieff mede over ons the besegelen mit sijne segel want
wij hier mede oiven[?] aen waren dair dit geschiede gelijck hier voir bescreven staetgegeve int jair ons heere duijsent vierhondert
vierendetachtich des sonnendages nae sinte katherijnendach |
