| Alle den ghenen die desen brieff zellen sien off horen lesen doe ic verstaen Mercelis Dircsoen van der Weerhorst schout tot
Bunnick van wegen mijns liefs ghenadiche heren van Utrecht dat voir mij ende voir die lantghenoten ende buere die hier na bescreve[n] staen quamen int gherechte Heinrick Jan Eerstssoens soen ende Willam sijn wijff ende begheerden eens oirdels off die neghen morgen lants mit allen horen toebehoren so groet ende so cleijn also die ghelegen sijn inden gherechte voirschr[even] streckende van loericker wech tot aen Houtensewech dair Jan van Scadic Gijsbertssoen voven naist ghelant is ende beneden Gherijt de Keijser also vrijen ende also losse hoir waren dat sij die mochten vercopen versetten versellen ende den vrije eijgendom off gheve[n] dien sij wouden ende hem wert toe gewijst mit recht ende mit oirdell dat sij well doen mochten ende dattet mit rechrte stedicheijt hebben sell ende aldaeir so gaven Heinric Jan
Eersts soens soen ende Willam sijn wijff voirsch[rev]en mit gheasmender hant alse recht wijsde ende mit horen vrien moet wille Roetgier Uiten broeck den vrijen eijgendom van den neghen morgen lants voirsz[egd] also als die hier voirbescreve ende bepaelt staen ende vertegen daer off mit handen voirsch[reve]n ende van allen rechte ende toeseggen dat sij dair aen hadden ende mede van allen vrieven die dair off roerende zijn tot behoeff Roetgiers Uitenbroeck voirg[enoemd] alse recht ende oirdell wijsde dat sij sculdich waren te doen ende dat die gifte ende vertichte voirsch[rev]en mit rechte stadicheit hebben ende houden sell ende Heinric Janssoen ende Willam sijn wijff voirgen[oemd] gheloefden mede mit handen gelijc voirsch[rev]en staet den voirseiden Roetgier dese negen mergen lants ende den vrien eijgendom daer off jair ende dach te waren alse erfcoep recht
is naden recht van den lande ende alle voircommer ofte doen behoudelic mijn genedige heer van Utrecht alle sijns rechtes zonder argelist hier waren over ende aen dair dit gesciede Bertout Mercelis soen, Aernt Dircs soen, Aernt Jacobssoen, Peter Willams soen ende Luijtgen Wouters soen lantgenoten ende buere inden gherechte voirsz[egd] ende anders veel goeder lude in kennisse der wairheit so heb ic Mercelis Dircsoen schout voirsz[egd] desen brieff besegelt mit minen segell van des gherechts wegen over mij selven ende mede over die lantgenote[n] ende buere voirsz[egde] om hore bede wille ende wij lantgenoten ende buere voirsch[reve]en oriconden dit ende tugen onder des schouten segell voirseijt ende hebben hem ghebeden desen brieff mede over ons te besegellen mit sinen segell want wij hier mede over ende aen waren dair dit ge
sciede ghelijc voirs[creven] staet gegeve[n] int jair ons here[n] dusent vierhondert neghen ende t sestich des saterdages na sinte valentijnsdach |