Alle den ghenen die desen brieff zellen sien off horen lesen doe ic verstaen Mercelis Dircsoen van der Weerhorst schout tot Bunnick in mijns liefs here[n] gherechte van Utrecht
dat voir mij ende voir die lantghenoten ende buer die hier na bescreven staen quam int gherechte Roetgier Uit den broeck ende gaff voir hem ende voir Katrinen sinen wille wille dair hij
tot dier tijt wittelike gheboirte bij hadde tot enen eweliken erfpachte Henrick Jan Eerstsoens ende sinen erfnamen die neghen mergen lants mit allen horen toebehoren so groet
ende so cleijn als die ghelegen sijn inden voirsch[reven] streckende van Loerickerwech tot aen Houtense wech dair Jan van Scade Gijsbertsspoen bpven naist gelant is ende beneden Gerijt de
Keijser ende dair Heinric Janssoen voirsz[egd] ende Willam sijn wijff voirtijts den voirsz[egde] Roetger Uiten broeck vrien eijgendom van de selven negen merge[n] lants inden voirsch[reven] gherechte of over
gegeven hebben Claes Jans om neghen goede gouden overlantsche koervorster rijnsche gulden die voir datu[m] des briefs ghemunt ende gheslagen zijn off paijment hore weerde in elker tijt der
betalinge ende dair toe Claes Jans om viertien witstuvers die onse genadige he[re] van Utrecht dair jailix uit heeft te betalen ende com[m]er vrij te levere[n] bijnne[n] der stadt van Utrecht
op des voirsch[reve] Heinric Janssoens ende sijne erfname[n] en[de] nacomelinge cost anpt ende arbeit indes voirsch[reven] Roetgiers ende sijne erfname[n] vrij seker behout alse die een helfte van den voirsz[egde]
gelde op sinte lambertsdach nu naest comende ende die ander helfte op sinte Peters dach ad cathedram dair naist comende off bijnnen viertien dagen na elken voirsch[reven] termijn onbegre
pen ende alse voirt jairlix erflic ende ewelike duerende mit sulken voirwairden so wanneer ofte tot wat tiden dat Henric Janssoen voirsch[reven] of sijn erfname[n] ofte nacomelinge[n] op enigen
termine[n] copen ende beleggen dese voirschr[even] negen gouden tijnsche gulden siaers erfrente uit enige[n] andere[n] eijgen erve inden ghestichte van Utrecht aen deser sijde der ijselen ende der lecken dair
Utrecht staet ghelegen ende gheen dijck geot en wair ende also goet ofte beter wair dan dese negen mergen lants voirsch[reven] nu sijn ende den voirsch[reven] Roetgier of sijn erfname[n] ofte nacoemlinge[n] ghe
brake zijns alsdan dair in vestichden ofte deden vestige[n] dat sij die vast ende zeker ware horen voirsch[reven] pacht jairlix te heffen en[de] te boeren gelijc voirsch[reven] staet sonder arch so sollen Roetgier
voirsch[reve] ende sijn erfname[n] ofte nacomelinge[n] als dan tot hore vermaninge hem dese negen mergen lants voirs[chreven] ende den vrien eijgendom dair off weder overgeve[n] inden voirsch[reven] gerechte op Henric
Jans soens voirg[enoemd] en[de] sijne erfname cost alse vrij ende also laste als Roetgier voirsz[egde] die ontfange hadde en[de] so souden dan dese negen mergen lants voirsch[reven] dan vrij quijt en[de] onslagen wese
vande neghen rijnsche gulden siaers voirsz[egd] so verre als Roetgier voirsz[egd] of sijn erfname[n] dan ghevesticht waren in maniere[n] voirsz[egd] behoudelic dat men Roetgier voirsz[egd] of sijn erfname[n] dan ijerst
uitreijcken ende betalen sell alle hoir afterstallge verschene[n] en[de] onbetaelden rente[n] als hem dan hier of verschene[n] en[de] onbetaelt wair ende also als Roetgier voirs[zegd] ende sijn erfname[n] jaerlix ont
fangen ende opvoeren sellen van Henrick Janssoen voirsch[reven] of van sinen naircomelinge[n] die viertien stuvers die onse genadighe he[re] van Utrecht heeft uit dese negen mergen so selle Roetgier voirsz[egd] ende sijn
erfaname jairlix weder goets tijts betalen onse[n] genadige he[re] van Utrecht of sinen rentmeijster inder tijt dese viertien stuvers siaers also dat dair gheen scade op gaet bute[n] Henric Janssoens
sinen cost en[de] scade mede so sijnt voirwairden alse wairt sake dat Henric Janssoen voirsch[reven] of sijn erfname[n] ofte nacomelinge[n] tot enigertijt versuijmden ende dese negen rijsche gulden voirs[egd] jair
lix uijt te goeder tijt en betaelden op elken termijn gelijc voirsch[reven] staet so waren sij als dan verallen van desen erfpachte voirsch[reven] ende claerlicken van allen rechts ende toeseggens dat sij aen
desen voirsch[reven] lande hadden of hebben mochten in enigerwijs tot behoeff Roetgiers Uitenbroeck voirsch[reve] en[de] sijne erfname[n] horen vrien wille dair mede te doen sonder enich toeseggen van Henric
Janssoen voirsch[reven] off sijnen ername[n] ofte nacomelinge[n] ofte ijemant anders van hore wege[n] also verre als sijt opneme[n] willen en[de] anders nijt behoudelic Roetgier voirs[zegd] en[de] sijn erfname[n] alle
hoirs versetens ende onbetaelden pachts al dier sonder argelist hier waren over ende aen dair dit gesciede Luijtgen Wouterssoen, Bertout Marcelissoen, Pieter Brouwer, Aernt Jacobssoen van
dermaet ende Willam Haermont lantgenote[n] ende buere inden voirsch[reven] gherechte ende meer goeder lude in kennisse der wairheijt so heb ic Mercelis Dircsoen schout voirsch[reven] van des voir
seiden gherechts wegen desen brieff besegelt mit minen segell over mij selven en[de] mede over die lantgenote[n] ende buere voirsz[egd] om hore bede wille en wat wij lantgenote[n] en[de] buere voirs[zegd] oirconden
dit ende tugen onder die scouten segel voirsze[gd] ende hebben hem gebeden deen brieff mede over ons te besegellen mit sinen segell want wij hier mede over en[de] aen waren dair dit gesciede gelijc voirs[chreven]
staet gegeven int jair ons here[n] dusent vierhondert negen ende t sestich de mane[n]dages na sinte peters dach ad cathedram