Allen den ghenen die desen brieff sullen sien off horen lesen doe ick verstaen Willem Taets van Amerongen schout int Ghoij ende tot Houten in
mijns lieffe heere gherechte van Utrecht dat voor mij ende voer die lantgenoten ende buere die hier naebescreven staen quam int gerechte
voirsz[egd] Johan van Oostrum Willemsz[oon] ende begheerde eens oirdeels off die drie morghen lants mit huijsinge boomgaert gheboemt en mit
allen horen toebehoerd alsoe die gelegen sijn tot Houten inden gherechte voirsz[egd] streckende van Loerijcker wech voert op aendie goeijer weteringe
dair Gerijt Arents z[oon]s erfnamen boven ende Johan Gerijt Harmens {zoon] beneden naestgelegen sijn alsoe vrij ende alsoe losse hem waer dat
hij die mochte vercopen versetten versellen ende den vrijen eijgendom dair off overgheven vrijlijcken wien dat hij worde ende hem
werdt gewijst mit recht ende mit oirdele dat hij well doen mochte ende dattet mitten rechte stedicheijt hebben sall ende aldan soe gaff
Johan van Oestrum voirsz[egd] voir hem ende voir Sophija sijnen wijve dair hij op dese tijt wittelike geboerte bij heeft over Wilger Jacob z[oon]s
tot behoeff der eersame priorinnen ende ghemeen convent van den heiligen elffduijsent meerchden regularissen gelegen bijnnen Utrecht
dan vrijen eijgendom vanden drie morgen lants mitter huijsinge boemgaert ende geboemt ende mit allen horen toebehoern voirsz[egd] alsoe
also die hier voir bescreven ende bepaelt staen ende verteech dair off ende van alle rechte ende toeseggens dat hij dair aen hadd ende
mede van allen brieven die daer off rurende sijn tot der errsamer priorinne ende gheeem convens behoeff voirg[enoemd] alse die lantgenoten
ende buere voirsz[egd] wijsden dat recht was ende hij mit rechte sculdich was the doen ende dat die ghijste ende vertichte mitten rechte
stedicheijt hebben ende houden sell ende geloefdet der priorinnen ende convent voirsz[egd] mede jair ende dach the vrijen ende the waren alse
erffcoop recht is naden rechte van den lande ende alle voircomer off the doen sonder arghelijst hier waren over ende aen dair dit geschied
Johan die Keijser, Willem Eertsz[oons] ende Gerijt van Oestrum lantgenoten ende buere inden gerechte voirsz[egd] ende anders veel goeder luijde in
kennisse der waerheijt hier off soe hebbe ick Willem Taets van Amerongen schout voirsz[egd] mijnen segel wthangende aen dese brieff
ghedaen vandes gerechts wegen over mij selven ende mede over die lantgenoten ende buere voirsz[egd] om hoir beden wille datwij
lantgenoten ende buere voirsz[egd] oirkonden ende tughen ende des schouten segel voirsz[egd] ende hebben hem ghebeden desen brieff mede over ons
the besegelen mit sijnen segel want wij dair mede over ende aen waren dair dit geschiede gelijck hier voir bescreven staet gegeven int
jair ons here duijsent vierhondert vierentnegentich op sinte martijns avont inden wijnter