Alle den ghenen die desen brieff zullen sien ofte horen lesen doen wij verstaen Egbert Geritsz schout tot Vechten in mijns liefs
genadichs he[re]n gerechte van Utrecht en[de] in hee[r] Johans gerechte van Renesse en Rennouwen ridder Willem Steen, Bartout Mercelis
z[oon], Jacob Aertsz en[de] Hermen Petersz lantgenoten en[de] bueren inden gerechte voirsch[reven] dat voir ons quam inden gerechte Tijman
Cluetinck ende gaff over van sinte Bartolomeeus gasthuijs wegen staende binnen Utrecht soe als hij dair toe gemachticht
georduuert en[de] geset was op dese tijt van den gemenen broederen en[de] huijsmeijste[re]n des gesthuijs voirsch[reven] nae uitwisinge des
machtiichts briefs die hij dair op dese tijt off toonde en[de] mede over gaff Ludolff Wouter Lijkenssen z[oo]n enen vrijen eijgendom
van een halve hoeve lants mit allen horen toebehoren alsoe groot en[de] cleijn als die gelegen leijt inden gerechte voirsch[reven] in Vechtere
broeck opstreckende uit die sijdelgrave tot goeijer maet toe der heren lant van sinte Marie[n] t Utrecht dair boven naest
gelant Rijsbrugger velt en[de] beneden naest gelant Jacob van Wijnsens erfnamen ende Tijmen Claerinck voirsz[egd] verteech
voirt van dit voirgenoemde gasthuijs wegen voir hem en[de] den gemenen broede[re]n en[de] huijsmeijste[re]n en[de] hoer[en] naecomelingen
vanden gasthuijse voirsch[reven] van dese voirsch[reven] en[de] bepaelde halve hoeve lants tot behoeff Ludolff Wouter Luijkenssen zoon
voirsch[reven] claerlijken mit allen rechte en[de] mit oirdele en[de] mede van allen brieven die dair off ruerende sijn alsoe als dese voirschr[even]
lantgenoten en[de] bueren wijsden dat hij mit rechte sculdich was te doen ende meer soe gelovede Tijman Cluetinck voir
hem en[de] voir den gemenen broederen en[de] huijsmeijsteren des gasthuijs vorsch[reven] en[de] voir horen naecomelingen op dat voirge
noemde gasthuijs goeden cost soe waer dat die gelegen sijn dese voirsch[reven] en[de] bepaelde halve hoeve lants te waren en[de]
te leveren en[de] te vrijen jaer en[de] dach als erfcoop rechte is en[de] alle voir commer en[de] voir plechten ofte doen meden rechte
van den lande alle dinck sond[er] arch en[de] list in kennisse der waerheijt soe hebbe ick Egbert Gerits zoon t voirsch[reven]
mijnen zegell aen desen brieff gehangen over mij selven van des gerechts wegenen[de] mede over dese voir genoemde
lantgenot[en] en[de] bueren om houre beden wille en[de] om gebrech houre zegelen op dese tijt en[de] wij kennen en tuijgen
dit als voirsch[reven] staet onder ons scout[ens] segell gelijcker wijs en[de] in alre manieren off wij dit mit ons selfs zegelen besegelt
hadden gegeven in den ja[er]e ons liefs he[re]n dusent vierhondert drie en[de] t seventich opt twijntichsten dach
in meerte