Allen den ghenen die desen brieff sullen sien off horen lesen doe ick verstaen Joest Gherijts schout inden gherecht van Schalckwijck
van weghen des edelen vermoghenden heren Johans van Lutremborc here van der oirdt van Vijlen van Culemborch van den Weerdt
van Hoegstraten van Borssel __ dat voer mij en voer die lantgenoten en buerliede die hier nae bescreven staen gecomen is inde voirsz[egde]
gherecht Johan Gherijt Hermansz die brouwer en begheerden aldaer eens oerdelo[?] off doen eijgendom van alsulken rechte aendeell
als hij hadde ende hem aenbestorven was van do[min]e Henrcikghen, Willims Gherijtsz wedue saliger gedachten in eenre halffver hoeffve landts
also die ghelege is inde voirs[zegde] gherecht op t Waellvelt streckende uijt Schalckwijcker Weteringhe totten opslach thoe van Waelre Weteringe
daer boven naest ghelant is Sinte Joesten gasthuijss en beneden Hubert Roeloffs mit lande die hij in erffpacht heeft van den convent the
Wittevrouwe bijnen Utrecht also vrij en losse sijn war dat hij die mocht vercopen versetten versellen en enen vrijen eijgendom daer
off overghene mocht wijen dat hij woude en hem wardt thoeghewijst omt tercht en mit oerdell dat hij dat well doen mocht mit
recht en dattet stedicheijt hebben soude doe rechte naert aldier so gaff Johan Gherijt Hermansz voirge[noemd] over Johan then Bossch rentemeijs[ter]
tot betheleheem buten Utrecht alse tot behoeff des convents voirsz[egd] enen vrijen eijgndom van alsulke rechten aendeell als hij hadde
en hem aengestorven was van dode voirsz[egd] inder voirsz[egde] halffver hoeffve lants also die hier voor bescreven en bepaelt staet en verteech oeck
mede daer off claerlijck van allen recht en thoeseggen als hij daer an hadde en van allen brieffve daer off roerende tot behoeff
den convents van Bethelehem voirsz[egd] als die lantgenoten en buerlice wijsden dat recht was en dat dese ghijfft en verticht
mit recht stedicheijt hebben en houden st-- en gheloeffden oick mede desen voirsz[egde] eijgendom the waren jaer en dach
en alle voirconmer off the doen als erffroep recht is naden recht van den lande aldinck sonder argelist hier waren over en aen
daer dit aldus ghesceijden als lantgenoten en buerlude inden gherecht voirsz[egd]Anthonijs Eerstensz, Willam Joestensz en Philips van
Rossem in kennisse hier off so heb ick Joest Gherijtsz schout voirsz[egd] over mij selffve en oeck mede over de lantgenoten en buerlude voirge[noemd]
om hoerre beden will desen brieff besegetl mit mine segell tot enen oerkonde van des gherechts weghen voirsz[egd] en wij lantgenoten
en buerlude voiren[oemd] eerkonden en taghen dese voirsz[egde] puncten onder ons scouten segell voirsz[egd] en hebben hem oick ghebede desen brieff
mede over ons the besegelen mit sijnen segell want wij hier mede over en aen ghewest hebben daer dit aldus gheseijt is als voirsz[egd]
staet gegheve int jaer ons heren dusent vijffhondert en seven opten elfften dach inden aprill __