Alle den ghenen die desen brief zellen zien of horen lesen doe ic verstaen Willam Stael richter tot Goije van mijns liefs
jonckeren wegen van Gaesbeec van Apcoude van Putte ende van Strijen dar voir nu ende voir die lantgenoten en[de] buere
die hier na bescreven staen gecomen is inden gherechte van den Goije voirseit Henrick van Scalcwijck ende begheerde
eens omdese of die viertiene hont lants mit allen hoven toebehoren alse gheleghen sijn aenden Haecsloot opstreckende
aenden Houtenschen wech dair boven naest ghelant sijn Gherijt Bollen erfnamen ende benden Gherijt van den Rijn
Herberens soen also vrij ende also los sijn waren dat hij die mochte versetten versellen ende den vrijen eijgendom of
genen dien hij woude ende hem wert gewijst mit rechte ende mit oirdele dat hijt wel doen mochte ende dattet mitte
rechte stedicher hebben sel ende aldan so gaf Henrick van Scalcwijck voirscreven Wouter Ludolfs soen den vrijen
eijghendom van den viertiene hont lants also als die voir bescreven ende bepaelt staen ende verteech dair off
tot Wouters behoef voir ghenoemt alse recht ende oirdele wijsde dat hij sculdich was te doen ende darret nuwen
rechte stedicheit hebben sel hier waren over ende ane dair die gheschiede Zweder van Oestrum, Willam Vreij Bogart
Peter Claes soen ende Henric Peters soen lantgenoten ende buere inden gherechte voirs[ech]t ende anders vele goeder ende
in oirconde deser dinge zo hebben wij Willam Stael scoute ende Zweder van Oestrum voirscreven onse zegelle aen desen
brief ghedaen over ons selven ende mede over Willam Vreij, Bogart Peter Claes soen ende Henric Peters soen voirsc[reven] om
hove bede wille en wij Willem Vreij Bogart Peter Claes soen ende Henric Peters soen voirsc[reve] oirconden en[de] tugen dit ander
deser boirgenoemde zegelle en[de] hebben hem gebeden desen brief over ons te bezegelen mit horen zegelen want wij
dair mede over en[de] ane waren dair dit geschiede alse hier voir bescreven staet gegeve int jair ons here dusent vier
hondert een en dartich op sinte Michiels avont