Ic Luijtgen Woutersz belije ende kenne voir mij ende voir mijne[n] erffnamen ende nacoemlin[en] dat ick tot enen ewelijken erfpacht ontfangen hebbe van heer Gheerloff van Donck canonick
then doem t Utrecht ende sijnen erffnamen ende nacomeling[en] vier morghen ende twe hont lants alsoe die gelegen sijn inden gherechte van Houten op streckende van den houten sche
wech aende biscops hoeve toe dair Arent Taets ende Anthonis Jacob die Brouwersz boven ende Johan van Oestrum Willemsz ende Ghijsbert die Craens erffname[n] mette[n] melaten
buijten Utrecht beneden naestgelant zijn van welken vier morgen ende twee hont lants voirsz[egd] ick mit mijne[n] voir en[de] naekijnde[re] den selven heere[n] Gheerloff op datu[m] des
brieffe den vrijen eijgendom inden gherechte voirsz[egd] off overgegeven hebben elcx siaers om derdenhalven ouden Vrancrijcxe schilt anderhalven goede gouden overlantsche
Koervorster rijnsche gulden die voir datum des brieffe ghemu[n]t ende geslagen zijn off paijment hore weerden inder tijt der betaling[en] voirs elken ouden schilt gherekent ende
om twe goede pacht capoen te betalen die een helfte van den voirsz[egde] renthen mit alle den capoene[n] op sinte martijns dach inden wijnt[er] ub naestcomende ende die ander helfte
op sinte peters dach ad cathedram dair naestvolgende off bijnne[n] eenre maendt nae elken voirsz[egde] termijn ombegrepen ende alsoe voert jairlicx erffelijck ende ewelijck vrijs
ghelts sonder enigerhande offcortinge ofte vermijnringe der renthen voirsz[egd] van allen ongelde ofte onraide dat ub op opten voirsz[egde] lande leijt ofte namaels dair op come[n] ofte
gheset mocht werden t sij van dijken damme[n] sluijsen watergangen van veden oirloghe voir brant waternoodt heere[n]scattinge latsettinge hoe ofte wat manije[re]n dattet
toecome[n] ofte geset mocht werden in enigerwijs ende all worde oick al overdraghen bij den drien staten van den lande dat dusdanige renthen mede ghelden souden dat en
sal mij noch mijne erffname[n] nochtans nijet the baten come[n] wij en sellen all den onkost ongelt ofte onraidt voirsz[egd] altoes then goeder tijt ghelden betalen make[n] ende
verware[n] op onsen koste buijten heere[n] Gheerloffs ende sijnre erffname[n] ofte nacomeling[en] koste ende schade miet sulken voirwairden wairt saicke dat ick off mijn erffname[n]
ofte nacomeling[en] dese voirsz[egde] renthen jairlicx nijet en betaelden op elken te[r]mijn gelijck ovirsz[egd] staet ofte enich van den voirs[zegde] punte[n] ende voirwairden verbraken enden
nijet en hielden soe vijelen wij van desen voirsz[egde] erfpacht ende clairlijken van alle rechts ende toeseggens dat wij hadde ofte in enigerwijs hebben mochten aende[n] vier
morgen en[de] twe hont lants voirsz[egd] ende dat selve lant voirsz[egd] opnaem dan weder vrij losse ledich ende ombeco[m]mert aen heere[n] Gheerloff ende sijne[n] erffname[n] ofte nacomeling[en]
voirsz[egde] heren vrijen wille dair mede the doen ombecroent ofte enich wederseggen van ijema[n]t indien ende alsoe verre also zijt dan opneme[n] wille[n] ende anders nijt behou
delijcken hem nochtans alle hoers verschene[n] ende ombetaelden pacht sonder arch in keninisse der wairheit soe hebbe ick Luijtgen Woutersz mijnen segel aen
desen brieff gedaen gegeve[n] int jair ons heere[n] duijsent vierhondert vijffendetachtich opten achtsten dach in meerte