Ic Gheerloff van der Donck canonick then doem t utrecht doe kondt allen luijden dat ick verkost hebbe
die eerbare heere[n] deken ende capittel der kercken then doem t utricht om een seker som[m]e van penni[n]gen
die sij mij voll ende all well verunricht voldaen ende betaelt hebben den ersten penninck mitten
eersten die vrijen eijgendom van derdenhalven ouden vrncrijcgen schilt ander halven goede gouden
overlantsche koervorster rijnsche gulden voir datum sbrieffe gemu[n]t ende geslagen off paime[n]t hore
weerden inder tijt der betaling[en] voor allren ouder schilt gerekent en[de] twe capoen siaers erslike renten die
ick jaerlicx hebbe uit vier morgen ende twe hont lants alsoe die gelegen sijn inden gerechte van Houten
opstreckende vanden Houtenschen wech aende biscops hoeve toe dair Arent Taets en[de] Anthonis Jacob die
brouwers soen boven ende Jan van Oestrum Willemsz ende Ghijsbert die Kuters erfgename[n] mitten malaten
buijten utrecht beneden naestgelant sijn ende dair toe noch drie goede goueden overlantsche koerforster
rijnschen gulden voir datum des brieffs gemu[n]t ende geslagen ofte ander goet paijment dair voir inder tijt
der betaling[en] ende twe goede pachtcapoen off twe stuiver tierent voer elke capoen oick erffelike renten
tot thien morgen ende anderhalff hont lants mit allen horen toebehoere[n] alsoe die gelegen sijn inden
gherechte van camerijcken in eenre zaten lants van twintich morgen dair die seven morgen ende
anderhalff hont lants voirsz[egd] off streckende sijn met dat oesteijnde indie voirweteringe dair in en[de] over
dat ander buerlandt keert ende mit dat westeijnde in camerijcker afterweteringe en[de] die drie morgen
lants leggen itte enen eijnde in camerijcker afterweteringe aen den seven morgen en[de] anderhalff
hont lants voirsz[egd] en[de] mitten andere[n] eijnde aen die wije dair Henrick Gerijtsz en[de] Adriaen Jansz nut
horen medewerckers suijtwaert en[de] Jan Sijmonsz mit sijnen medewerckers mit des biscops lant va[n] Utrecht
noortwairt naestgelant zijn van welken lande voirsz[egde] Luijtgen Woutersz erffnamen die vier morgen
en[de] twe hont lants tot Houten gelegen ende Ghijsbert Cluetinck off dair hijt mit recht ghelaten heeft en
thien morgen en[de] anderhalff hont lants in camereijcken gelegen elcx off in erffpacht hebben nae inhout
der erffpachtbrieve dair van wesende ende ick schelde dairom[m]e die voirs[zegde] heere[n] deken ende capittel voirsz[egd]
en[de] heren nacomeling[en] voir mij en[de] voir mijne[n] erven en[de] executoers van den alingen renthen voirsz[egd] claerlijcke
qwijt en[de] dancke den eerbare[n] heere[n] voirsz[egd] dair off goeder betalinge ende ick hebbe mede geloeft ende gekent
voer mij ende voir mijnen erven en[de] executoers aen handen den eerbaere[n] here[n] deken en[de] capittel voirsz[egd] alse
dat ick hem dese derdenahlven ouden vrancrijcxschen schilt ende drie gouden overlantsche koervorsters rijns
gulden siaers erffelicke renthen voirs[zegdl elcx inden gerechte voirsz[egd] overgheven ende hem dair soe inne
versekere ende vestigen sell dat sij des vaste ende seker sijn soe wanneer die eerbare heere[n] decken en[de] capittel
voirsz[egd] mij off mijnen erven en[de] excutoers voirsz[egd] des vermanen ofte vermane[n] doen sonder enig[er] hand
arghelist in kennisse der waerheit hier off soe hebb ick Gheerloff van der Donck canonick voirsz[egd] dit
onderscreven mit mijns selffs hant ende dair toe mijnen segel uithangende aen desen brieff gedaen
gegeven int jair ons he[re]n duijsent vierhondert drie endtnegntich opten sesten dach in septembrj | 