Ick Eerst Paeus Willemsz lie end kenne dat ick voir mij en mijnen erfgenaem van den eirwerdighe
end vroemen heren heren Steven van Zulen van Nijevelt lantcomend[eu]r der balijen van Utrecht
duijtshes oirdens gehuert end in pacht genaemen hebb acht margen lants alsoe groet
ende cleijn als die gelegen sijn int Goij gelijck Willem Eersten mijn vaeder die te
bruijcken plach in die voirgaen[de] jaeren tijen jair lanck an een durende ingae[n]de
Petri ad Cathedram anno XV en tweentwijntijch des jairs den hoop tsaemen
om achtenhalven oulden schijlts vijffende dartijch hollantsche stuver voir elcken
schijlte gereckent vrij gelt van all dat dair van comen mach wijtgescheiden
apen waijen apen oirloghe en groit margen gelt dat bij den here vander
lande en den drijen staten wijtgesatt sell warden dair salmen mij inne doen
alsmen baven en beneden doette betaelen die ene helffte martinij in den wijnter
naestcomende ende dander helffte petrj ad cathedram dair naistvolgende off bijnnen
viertijndaeghe nae elcken termijn onbegrepe en alsoe voirt jairlicx van termijn tott
termijn dese voorsz[egde] tijen jairlack duerende ende dit voirsz[egde] lant sall ick
Eerst voirsz[egd] bewaren als een goet huerman en pachte schuldijch is te doen
mit voirwairde wairt saick dat ick Eerst off mijn erven voirsz[egd] desen voirge[noemde]
pacht nijet en betailden en die ander vourwarden nijet en hielden noch voildeden
als voirsz[egd] staet soe sall ick off mij erven dair die versunenijsse bij geschieden
vervallen wesen van deser hueren en van allen rechten en toeseggen dat ick
tot dien daeghe toe dair an gehadt mocht hebben soe vere die lantcomand[eu]r
dat weder an hem neme will en anders ende soe mach die lantcomand[eu]r off sijn
naecomelingen inder tijtd dit voirsz[egde] lant en dese huer vrij weder om hem nemen
en sijnen vrijen wil dair mede doen tot sijns ordens behoeff onberroert van mij
off mijne en nochtans hem te betaelen alle sijnen verschene ende o[n]betaelden pacht
all dijnck sonder argelijst in kennijsse der waerheit ende want ick Eerst
voorsc[re]ven selff geen zegell en hebbe soe hebb ick gebeden den erba[r]en Tonijs
Eersten mijnen ohem desen brieff over mij te willen besegellen twelck ick
Tonijs Ersten gerne gedaen hebb en hebb mijnen segell ter bede en over Eerst
Willemsz mijen even an desen brieff gehangen begeven int jair ons he[re]n
duijsent vijffhondert en tweenentwijntijch opten negenden dach van aprijll | 