Ick Bernt Joesten lie ende kenne dat ick voir mij ende voir mijne erffgenaemen vanden eirweerdighe en vrome
here heren Steven vanZulen van Nijevelt lantcomanduer der balijen van Utrecht Duijtsches oirdens gehuert ende
in pacht heb ontfangen vijffendetwijntich margen lants gelegen tot Schalckwijck alsoe groet ende cleijn = als ick
die laest gebruijckt hebb twijntich jairlanck om een durende ingaende Petri ad Cathedram anno vijffthienhondert des
seesendetwijntich des jairs om tweendetwijntich gouwe vranckrijcxe schilde off die weerde dair voor
inder tijtd den betaelinge ende vierendetwijtich goeder pacht honre vrij gelt wujtgescheiden apen waijen
apen oirloge ende groit morgen gelt dat bij den here vanden lande en den drijen staeten
wuijtgesath warte dair salve mij inne doen alsmen boven ende beneden doit te betaelen die ene
helffte vanden gelde ende alle die honre Martinij inden wijnter ende die ander helffte Petri ad
Cathedram dair naest volgende off bijnnen vierthiendaeghen nae elcke termijn onbegrepe ende alsoe
voort jairlicx van termijn tot termijn dese voirsz[egd] twijntich iairlanck an een durende ende
dit voirsz[egde] lantde sall ick Bernt voirsz[egd] off mijn erven bewaren ende onderhouwe als een goit pachter
ende huerman schuldich is van doen mijt voirwarde wairt saicke dat ick Bernt voirsz[egd] dese voirsz[egde]
pacht jairlicx nijet en betailen ende die andere voirwarde nijet en hielde noch voilcede als die
voirgeschreven sijn soe zall ick Bernt voirz[egd] off mijn erven dair die versumenijsse bij geschieden
vervallen wesen van desen hueren ende voirt van allen rechten ende toesegge dat ick tot den
daeghe toe inde voirsz[egde] lande gehat mochte hebben soe vere als die lantcomand[eu]r dat weder
an hem nemen will ende anders nijet ende soe mach die lantcomand[eu]r] inde tijtd dit voirsz[egde] lantd
oirdens behoeff onberroert van mij off mijne erven ende nochtans hem te betaelen alle sijne verschene
ende onbetaelden pacht alle dinck zonder argelijst en kennijsse der wairheit ende want ick Bernt
voirsz[egd] selff genen segell en hebb zoe hebb ick gebeden den eersaeme Thonijs Ernsten om desen
brieff met mij te willen besegellen twelck ick Thonijs Ernsten voursz[egd] gerne gedaen hebb en
heb mijne segell tot bede ende over Bernt Joesten voirsz[egd] an desen brieff gehange begine
int jair ons her[e] duijsent vijffhondert Seesendetwijntich opte thienden dach des maents januarij | 