Goij

Pachtbrieff van Eerst Willemsz Paeu va[n] t selffde de data XV^c XXIJ

Ick Eerst Pauw Willemsoen lije en kenne dat ick coir mij en[de] mijne eerfgename[n]
van den eerweerdige en[de] vrome heeren here Steve[n] van Zuijlen van Nijevelt
lantcomendeur der balijen van Utrrecht Duijtsches Ordens gehuirt en[de] in pacht
genome[n] heb seven merge[n] lants alsoe groet en[de] cleijn als die gelege[n] sijn int
Goij gelijck Willem Eersten mijn vader die in die voirgaende jairen the bruicken
plach en then Duijtschenn huis der kercken toe behoere thijen jair lanck
om een duirende ingaende petrj ad cathedra[m] anno XV^c en[de] tweentwijntich
des jairs om soevendenhalven golden gulden van ghewicht off die rechte overde
dair voir in der tijt der betalinge vrij gelt van all dat dair op come[n] mach
uijtgescheijden open waijen open oirloge en groeot merge[n] gelt dat bij den heer
van den lande en[de] den drien staten uijtgesath sal worden dair halven mij inne
doen alsmen boven en[de] beneden doet the betalen die een helft martini inden
wijnter naistcomen[de] ende dander helft petri ad cathedram dair naist volgen[de] off
bijnen veertiendaege nae elcken termijn onbegreepe[n] en[de] alsoo voirt jairlicx
van termijn tot termijn dese voirsz[egde] tijen jair lanck durende ende dit voirsz[egde]
lant sall ick Eerst bewaeren als een goet pachter en huijrman sculdich is
the doen mit voir wairde wairt saick dat ick Eerst voirsz[egd] off mijn erven
desen voirsch[reven] pacht nijet en betailden ende die ander voir wairden nijet en
hielde noch voldede als voirsz[egd] staet soe sall ick Eerst voirg[enoemd] off mijne erve[n]
dair die versuimenisse bij geschieden vervallen weesen van deeser huijren
en[de] van alle rechten en[de] toeseggee dat ick dot dien daghe thoe dair aen
gehadt mocht hebben soe vere die lantcomendeur dat weder om hem neme
will ende anders nijet ende soe mach die landtcomendeur inder tijt off sijn
naecomelinge dit voirsz[egde] landt en[de] dese huijr vrij weder aen hem neme[n] ende
sijnen vrijen wille dair mede doen tot sijns oirdens behoeff onbecroendt
van mij off mijne erven en[de] nochtans hem the betalen alle sijne verscheene
en[de] onbetailden pacht alle dinck sonder argelist in kennisse der wair
heit ende want ick Eerst voirsz[egd] selver geen segellen heb soe heb ick ge
 

Goij

beden den eerbaren Tonijs Eersten mijne ohem desen brieff over mij the willen
besegellen t welck ick Thonijs Eersten voirsz[egd] geerne gedaen hebbe en[de] heb
mijnen segell the bede en[de] aner Eerst Willemsz mijne neven voirgen[oemd] aen dese
brieff gehangen gegeven int jairs ons heeren duijsent vijffhondert en twee
endetwijntich opte[n] negenden dach in Aprill
 

concordat pr[esen]s copia cum suo originali
teste me Lamberto infrascripto

Lambertus Francken de Elborch not[ari]s sszt[?]

collationata pr[esen]s copia cum suo originali
teste me not[ari]s heronimus Joh[anne]s not[ari]s sszt[?]