alle die ghene die desen brieff sullen sien off hoeren lesen doe ick verstaen Jan die Witt Jansz dat ick dorch ende overmides overghijft ende
transport Dirck Jansz van Oistrums mijn broeders in leven ewighen erffpacht ondtfanghen hebbe van den eerweerdighen trentfesten ende
vromen heeren heer Aelbert van Egmondt van Meresteij[n] landcomenduer der balijen van Utrecht duijtsches orders sestehalve margen landts
zoe groet ende cleijn als die aen vier stucken gelegen zijn inden karspel van Houthen inden eersten darde halff margen daer die papelicke
proven van Houthen ende die heeren van Sinte Marrien t Utrecht beneden naest gelandt sijn eenen margen daer Henrick Jan Eerstenssz
erffge[namen] boven ende die papelicke proven van Houthen versz[egd] beneden naest gelandt sijn tijend halff hondt landts daer Jan die Witt des costers erffge[nam]
nu ter teijt Willem van Oistrum Snoeijens off sij[n] erffge[namen] boven ende die costere van Houthen beneden naest gelandt sijn twee hondt lants
daer die heeren va Sinte Marrien t Utrecht boven ende Ghijsbert Gerritsz van Schaijcks erffge[namen] off nacomelingen beneden naest gelandt zijn
elcx siaers the samen om drie mudden weijts goet coopmans goet ende twee hoenre the betaelen en[de] vrij the leveren then duijtschen huijse
voers[zegd] opten solve tot tween termijnen waer van d eerste termijn verscheijndt martini in den winter ende dander helft op sinte peters
dach ad cathedram daer naestvolgende off binnen twee maenden na elcken termijn voirsz[egd] onbegrepen op t versuijn van den erffpacht
op die peene van een mudt weijts als vrij van all t ghene dat daer op ijs ofte comen solde moeghen nijet uuijtgesondert
mijt voirwaerden dat ^ick Jan of noch mijn erffgenamen daer desen erffpacht op comen sall dit voirsz[egde] landt nijet splitten noch deijlen noch
in gheene vreemder handt brengen buijten wille ende consent des landtcommendeurs in der tijt nae den erffpacht versz[egd] sell altijt
comen ende erven op eenen van mijn rechten ende naesten erffgen[amen] dan wesende inder tijt ende daer desen erffpacht vers[zegd] aldus op coempt
sall binnen siaers bij den landtcomenduer comen en[de] versaeckent mijt eenen gouden penninck ende als dan sall die landcommend[eur]
ver[szegde] nijeuwe brieve gheven ende nemen inhoudende als desen brieff ende off daer eenich versuijm in ghebreke als ander
betaelinghe ende puntten voirsz[egd] zoe mach die lantcomendeuer indertijt off sijn nacomelinghen t sijnen vrijen wille mitten versz[egde]
lande doen onbecroendt van ijemandt indijen ende alsoe verre als die lantcommend[eu]r versz[egd] off sijn nacomelingen dat versuijm
aen hem nemen will ende anders nijet schendelicken altijt die verschenen ende onbetaelde pacht die dan daer iss onbe
taelt ware the betaelen alle dunck sonder argelist in kennisse der waerheijt alzoe ick Jan die Wit voirsz[egd] op dese tijt
selver geen zegell en gebruijcke hebbe ick gebeden den eerbaren Anthonius de Man desen brieff mit zijnen zegel over mij te
willen bezegelen t welck ick Anthoins de Man voirsz[egd] ter bede van Jan der Wit voirn[oemd] geerne gedaen ende mijne zegel aen desen
brieff gehangen hebben gegeven int haer on sheren duijsent vijfhondert eenen veertich opten thienden dach van der maendt augustij